Posted on: 13 January 2019 Posted by: redaksi toknyong Comments: 100

Endah ceghiteu ughang, ceghiteu tol atau buel-buel ughang, mendok jek, ndik taulah. Bulih jik, sekedu buel-buel ambak. Ceghiteu nabuk. Tapi, ndik hallah. Nag sedep gik. Kisah die de, koh ni. Adeu sughang tok aki idup cok sebuih umah dengen cucok bin. Ughang due beghenek ndok de, diem kat kebun. Tok aki ndok ti, adeu cucok, neme e, sebut jek Asan. Sukeu Asan ndok ti, cucok tok aki ndok de, muet penghenggab pelanduk. Pokok e, tiap aghi muet pengenggap dan tiap pagi lak pegi mandau meghenggap endok de.

            Atok aki lah ghenyah negih, supayeu lah jedi muet peghenggab. Bin lah ghisaugek. Mebeu ndek, hok lah bebulen-bulen muet peghenggab, masok utan kelua utan. Lah mbeu benyek anak kau ditebeng, dipaghang nak muet peghenggab, gi mandau e tiap aghi lak. Hok eh e, sikok pelanduk, napoh keu mang ndik suah kenak alu. Tapi, Asan ndik leyan tegih atok aki e. Bin, malah, penah bepepe kali ngabo dengen atok aki, nandek tunggu jiklah, kan depat napoh beso! Pokok e, cakap Asan mang adik temigheng sikit. Nengo koh ndok, atok aki ndik leyan dik. “Gesak kaulah, Asan,” lih binlak.

            Pagi ndok de, aghi agik gelep-gelep salah. Ayam lom tughon deghi panda. Lom kelua deghi gheben. Tok aki maseh tido. Asan cepat ndeu bengun. Sambai lupak nyuas muke. Aek liu besek sambai betagheng sok pipi. Bin sibuk nu ngasok beju, selua, dan nyapai isok ambeng. Bin jelen pakai kaki ayam. Ngenjus jik. Nambak lah ngenjun kali jek. Laju. Ndik sembat nuleh kighek-kanan. Bin jelen, ndik lameu sudih ndok, masok delim ghebik. Bin gi nyuso peghenggap. Pandau sutek, ndek gik binggas. Ghenong umban deun ludei delem peghenggap ghijing lah dimakan pelanduk. Deun udeu depan peghenggap abis lalu. Nang sial beno, peletong peghenggap ndik bingga-binggas. Lah kesoi Asan nyuso peghenggap, tinggel sutek dik. Lah, Deghi jeuh bin nong lak ndik nambak dik pegehnggap. Bin pun ngambo, beleghi, melutu nembeh ghebik. Nang nata lalu. Nyasap. Ndik tau ndik, dughi pon bin temboh. Beleghi meghesau lalu!

            Ghupeu e. Peghenggap bin lah binggas. Bin ngukok, canggong, nilek delem peghenggap, eh, lah adeu nduk. Peghenong bin ndik salah diklah, delem peghenggap lah kenak sikok napoh beso. Eh, Asan de pon langsung jik beghembas pulas nak nanggap benetang delem peghenggap ndok de. Bin ambik aka caghek, sudih ndok bin pun lah lu nyeghet jik kaki benetang delem peghenggap de. Bin meghaseu saehlah, delem peghenggap ndok, napoh!

            “Lah, kenak au. Ceghek aseu-e. Menda agik. Betang le kau kenak ilot lih isok saghong atokku,” kateu Asan sambil naghek kaki benetang ndok de dan mukak peghenggap.

            Benetang ndok de langsung Asan kilep dekat ketiak bin. Sudih ndok ti, bin pon beleghi laju, melanda, sambai tesunggo-sunggo nuju ghumah punduk. “Ki…. Ki…. Napoh, Ki…. “ Asan maken laju beleghi dan endik teghaseu lah dekat ghumah. “ Napoh, Ki….”

            Tuk Aki tughon deghi cok tanggik. Bin nambak teungip-ungip. Lelah gik. Mendeu endik e, tekejut nengo pekik Asan. Bin lah nambak tol benetang yang dikilep lih Asan, cucok bin. “Benetang mbeu kau kilep e, ha?” tanya Tok Aki

            “Napoh, Ki….”

“Ha, Napoh!?”

“Aok, Napoh, Ki?”

“Nong. Bewik lekas sini. Aki nak ngenong e. Mbeu tol ndok napoh. Jengen-jengen, ukan. Die ndok bebi utan.”

“”iyeu, Ki. Ni nang napoh tol! Aku kenal gek e dengen napoh.”

“Ukan, San… Ndok ukan napoh….”

“Ye, Ki. Ni napoh. Dei kenak peghenggapku. Napoh, Ki…”

“ukan, Asan…. Ndok ukan napoh, tapi anak bebi. Kau nong tol-tol, ndok bebi agik cugheng. Anak bebi San!”

“Ni napoh, Ki. Ukan anak bebi…. Atok ni macam ndik kenal jik….”

“Asan… Ndok nang ukan napoh, tapi nang betol-betol sikok anak bebi!”

“Yeu-keu mbeu tok. Ni bebi?”

“Yeu, Asan. Ndok ukan napoh, tapi bebi. Lepas, kau lah megeng bebi. Tangan, beden kau jedi agham. Lepas bebi ndok, biu atok tebes le-e e pakai isok ambeng, yu dei mambos! Beghik asok makan e!”

“lepas ke, tok?”

“dek, aok e, lepas, cepat!”

Asan pon langsong jik melimba benetang daghi cok kilep bin. Sudih ndok ndik betimboh, Tok Aki langsung jik lak ngayon isok saghong. Sebenda jik, lah manjet deghuh. Betang le-e benetang ndok de, le-e bebi agik cugheng lah besepai nyaghes putos.

Sumber: Ibrahim, Abdul Kadir. 2013. Tanah Air Bahasa Indonesia. Jakarta: Komodo Books (hal 63-65)

100 People reacted on this

  1. Can I just say what a comfort to discover a person that genuinely knows what they are discussing online.
    You actually understand how to bring a problem to light and make it important.
    A lot more people need to read this and understand this side of your story.
    I can’t believe you’re not more popular given that you surely possess
    the gift.

Leave a Comment